వాకిట్లో
వెలుతురు
చీకటి చుట్టూ అల్లిన రాత్రి
కంట్లో
ఒంట్లో
ఒక నిద్దుర
మగతగా
ఎప్పుడో బయట పడ్డ కిటికీ చూపులు కిర్రున
చెవుల పక్కగా వెళుతూ
దుప్పటి కప్పిన ఒక ఆత్మ
నల్లగా నవ్వుతూ
వేళ్ళు
పంచుకుంటున్న చలి
కొన్ని కొంకర్లు
ఓ పక్క ముసురుగా వాన
ఎప్పటి నుండి వచ్చిందో గదికి ఆవల
నన్ను తడుముదామని చూస్తూ
బావురుమన్న ఆకాశం అంతకు ముందు
కళ్ళ చిత్రాలు ఆరోజు
కాగితం కల
నిన్ను గీస్తూ
నన్ను కలుపుతూ
తెల్లార్లు తోపులాట
గాలి పువ్వులు
ఒకదాని వెంట మరోటి
ఉదయం
రాలిన పిచ్చుకలు
నూకల కుచ్చిళ్ళను నెమరుతూ
నే
లేచేసరికి
ఇదిగో తీసుకో
ఈ క్రాంతి
కాంతి
సూరన్న పలకరింపు
No comments:
Post a Comment