మట్టిపురుగు

అక్కడొక వృక్షం
ఇప్పుడు పడుకుని
చేతులు కాళ్ళు ఎవరో కొట్టుకు పోయారు

భుజం మీద తన గుర్తులు
చెరపలేని పుట్టుమచ్చలు
మట్టి తవ్విన శబ్దం
చెవుల్లో గిరిగీలు తిరుగుతూ

దోసిట్లో కొన్ని నీళ్ళు
ఎవరో పోసినట్టు
పొత్తికడుపు అదిమిన ఆత్మీయ స్పర్శ
కళ్ళముఖంలో చెమ్మ
కాండం మీద కూర్చున్న పిచ్చుక పిల్లలు
రెప్పలను గాలితో కడుక్కునే దృశ్యం

నడుస్తూ తోటప్రేమ
చుట్టూ చుట్టుకున్న పాముల వేర్లు
అందమైన మట్టి పురుగులు
పెదాలపై పాకుతూ
నీకొక అనుభూతి చూసిన ప్రతిసారి
మిగిలిన నల్లసున్నం

ఆకులదీపాలు పచ్చగా మెరుస్తూ
హత్తుకునే ఉదయాలు
బాధను జీర్ణం చేసుకునే ఒక నవ్వు
చెక్కని ఒళ్ళు పేళ్ళుపేళ్ళుగా
అన్ని సమయాలు
తడిచేసే మనసు హస్తం
కొన్నిసార్లు కళ్ళలో
ఇంకొన్నిసార్లు మనసు సమాధుల్లో

కడుపు నిండిన తృప్తి భూమిలో
ప్రసవం వాననీళ్ళు
ఓ విత్తనం మళ్ళా ఇప్పుడు తల తెరుస్తూ